Li folies cadet (Haiku)

 

Li folies cadet

in un bell jardin tranquil

nequí videt les

 

 

 Li Castelle de Sand

Scrit de Emma Iland* con me

 

 

 

 

 

 

 

 

 

 

Plage

Svimmar e luder

Yelb e blu

Constructer castelles de sand

Vacanties

  Yo esset in li vacanties con mi familie. Yo esset sur li plage. Li sole brilliat e yo portat mi nov verdi costume de balne. Li sand esset yelb e calid. Li mare esset blu e quiet.

Yo constructet un castelle de sand con un turre e un ponte. Poy yo svimmat e ludet in li aqua. Yo juit li frisc aqua e li undes caressat mi córpore.

Li mare venit. Li aqua tuchat omni coses sur li plage, ma ne mi castelle. It fluet circum it e li sand circum it restat sicc.

„To es strangi“, yo dit. Ma li mare ne respondet e ne explicat to.

In li nocte yo ne posset dormir. Yo devet pensar pri li castelle. Yo revenit al plage in li tost matine. Mi familie ancor dormit. Li mare esset alt, ma li aqua ne tuchat li loc de mi castelle. It fluet circum it, quasi it vell timer li sand.

E tande yo videt it: sub li aqua, circum li sicc loc de mi castelle, ta esset un altri castelle. It esset plu grand quam mi castelle, con du turres. Li sand del altri castelle esset obscur e old. Li aqua nequande hat tuchat it til hodíe.

Li mare ne gardat mi castelle, ma li altri. Mi castelle stat sur li sicc loc in li medie de it.

Yo constructet un litt turre sur mi castelle.

In li matine li mare esset bass. Li altri castelle stat in li sand, sin aqua. It have un nov litt turre, sur li sam látere quam mi castelle.

Yo scrit mi nómine in li sand proxim li castelle: EMMA.

Li mare leet it. It ne oblivia it.

 

*Emma Iland es mi virtual filia. Ella creat li textu self, ma yo ha corectet e supleet li textu. Li poema in li comense es de me.

Tis, qui defia (Traduction de un canzon de Laibach)

Yo ha traductet li canzon "Tis, ki izzivaš" (Tis, qui defia) del marvelosi slovenian rock musica gruppe LAIBACH in Interlingue. Li canzon es tre old. It esset por li unesim vez publicat in li annu 1985. It es un misteriosi e obscur canzon con un strangi e misteriosi textu.

 

 

 Ci es li textu de "Ti, ki izzivaš" in Interlingue.

 

 TIS, QUI DEFIA

Tis, qui defia. 

 Ne sercha covritura.

To ne es un signe de grand corage. 

Ea sol al efusion de sangue. 

E peri. 

Si tu es vermen un heróe.

Li Obscur Castelle

Poema original in Interlingue

Li Obscur Castelle

Profund' in li forest,

It es mal quam li pest.

Sta sur un parcelle,

Li obscur castelle.

Detra li spess mures,

Tenebrosi ombres.

Li cries resona,

Li musica cessa.

 

Li fantomes dansa.

In li vacui sala.

Forlassat salones,

Extintet ánimes.

Null plante e null flor,

Cresce sin li amor.

Sur maledit suol,

Regna li diábol.

Condamnat por sempre,

Ti dom del inferne.

Su témpor es finit,

Su lude es perdit.

 

 

 

Li Baptisme sub li Triglav - Drama in un minute

 Li Baptisme sub li Triglav

Secun li drama Krst pri Savici del slovenian poet Dominik Smole esset creat li drama in un minute "Li baptisme sub li Triglav" del teatre Scipio Nasice. Li musica esset creat del famosi slovenian gruppe Laibach. Ci ti es li textu del drama in un minute "Li baptisme sub li Triglav"in Interlingue.

Li baptisme sub li Triglav es un version del slovenian national epopé "Li Baptisme apu li Savice" del national poet France Preseren quel esset publicat in li annu 1836. It es li raconta pri li heróe Crtomir e li femina quem il ama, Bogomila. Li drama eveni in li témpor del violent introduction del cristianisme in Slovenia in li medievie. Bogumila esset sacerdote del pagan deessa Ziva, ma nu Bogumila ha convertet al cristianisme. Ella persuadet Crtomir que il lassa baptisar su. Li drama acte se pri li emotiones del persones e pri li slovenian national identité in li contextu del cristianisme.

 

 

 

Drama por un minute:  Li baptisme sub li Triglav.

Bogomila: Yo inconcrat le quande il curret tra li cafés del cité.

Il aproximat se a me con un horribil rigid rise e tant distordet,

il dit quam un ínmobil terribil masca:

Crtomir: Li voca deve esser potent.

Li voca deve sonar, it deve esser audit.

Li fortie quel propulse li homan spiritu sur li líber via,

Adavan e adsupra ne es un fisical spiritu.

Cardinale: Li nigri manu pende súper il.

Li nigri manu del religiones e del ideologies

Li necessitá ha prendet le in su servicie e il execute it sin saver it.

Bogomila: Esque it es possibil haltar le?

Cardinale: Il es un prisonario del forme.

Il es captet in li spiritu del arte.

 

 

 

 

Li pavon e li chuvo (Fabul de Aesop)

Yo ha traductet un altri curt fabul de Aesop.

Li pavon e li chuvo

Un pavon e un chuvo disputat pri li avantages de lor qualitás. Li pavon fanfaronat  con li splendore, li color e li grandore de su plumes.

Li chuvo consentit a to omnicos e comentat solmen, que omni ti bellitás ne es apt por li max important cose: por volar.

Li chuvo forvolat e li pavon restat embarassat sur li suol.

Morale: Ne es orgolliosi solmen pri extern qualitás!

Li Camel (Fabul de Aesop)

Yo ha traductet li fabul "Li Camel del famosi grec poeta Aesop in Interlingue-Occidental.

LI CAMEL

Fabul de Aesop

Quande li homes videt por li unesim vez li camel, ili astonat pri li grandore del animale e fugit in consternation.

Bentost ili tamen comprendet que it ne es tant horribil qualmen ili hat expectat, ma que on posse it facilmen domitar. Ili captet it sen grand pena e usat it por lor scopes. Li camel lassat omnicos far con se tre patientmen e it evitat chascun dangere.

Nun li homes comensat despecter li camel, pro que it malgré su grandore e fortie nequande esset renitent, ma tolerat chascun injurie quietmen. Li homes bridat it e lassat it ducter de lor infantes.

Morale: Lass te ne aterrer de chascun cose quel aspecte dangerosimen.

Li occulares del horrore (Obscur legende)

 

 LI OCCULARES DEL HORRORE

Obscur legende in Interlingue

Desde tre long témpor yo finalmen traductet e expandet denov un curt obscur legende in Interlingue-Occidental. Yo trovat la raconta in li internet e changeat it un poc. Li titul del raconta es "Li occulares del horrore", Yo anc porta occulares, ma til nu nequó evenit a me quam con nor povri heroa Ines qui devet ear comprar nov occulares. Qui pensa que to posse esser dangerosi...

Ines narra li sequent raconta:

"Yo besonat nov oculares e yo eat con mi matre al optico. Ta it hay un modelle por un special precie. It esset vermen tre modic. Quande yo departet del butica, yo esset tre astonat: Subitmen yo videt partú strangi besties.

Yo questionat mi matre ca ella save quo eveni ci. Ma ella regardat a me e esset surprisat: "Ines, quel animales? Yo ne vide les!"

Evidentmen solmen yo posset vider li besties. Pro to yo deprendet li oculvitres e in fact li animales desaparit. Tre strangi!

Yo retornat al optico e petit le ca il posse denov controlar li oculares. In ti moment yo audit un strangi rugiment*.

Yo tornat me e terret: Rect detra me stat un del animales e attacat me"

*Rugir es li son del leon

Li nov season del Ski-Saltation

Ti fine-di-semane comansa it denov, li mund bocale del Ski-Saltation del Mannes. Li complet hiverne va li athletes saltar in li profundore e va far centes spectatores felici. Li comense va evenir in li polones Wisla con un team-event. Qui va esser li optim e posse comensar con un victorie?
Til li crist-festa va li mund bocale viagea fro Kuusamo, Nischni Tagil, Klingenthal til Engelberg. Pos li crist-festa va comensar li “calid fasa” e con li Quar-Salterías Torney va li athletes festar li nov-annu-festa. Oberstdorf, Garmisch-Partenkirchen, Innsbruck e Bischofshofen es li classic saltería e in li passat annu posset li japanesi Ryōyū Kobayashi victer e il victet omni 4 stationes. Poy li mund bocale va continuar in Predazzo e con li unesím “Titisee-Neustadt Five” in Germania, pos un viageation vers Zakopane e Sapporo va evenir li triesím “Willingen Five”, anc in Germania. Pos li season va continuar in Tauplitz, Râșnov e in Lahti. Traditionalmen va li season finir con li “Raw Air” e li chmapionatu mundal de ski-volation, 2020 in Planica.

Li calandre

23-im e 24-im novembre in Wisla
30-im novembre e 1-im decembre in Kuusamo
7-im e 8-im decembre in Nischni Tagil
14-im e 15-im decembre in Klingenthal
21-im 22-im decembre in Engelberg
Li Quar-Salterías Torney 2019/2020:30-im decembre in Oberstdor
1-im januar in Garmisch-Partenkirchen
4-im januar in Innsbruck
6-im januar in Bischofshofen
11-im januar in Predazzo
18-im e 19-im januar in Titisee-Neustadt quam li Titisee-Neustadt-Five25-im e 26-im januar in Zakopane
1-im e 2-im februar in Sapporo
8-im e 9-im februar in Willingen quam li Willingen Five15-im e 16-im febraur in Tauplitz quam Ski-Voltation
21-im e 22-im februar in Râșnov
29-im februar e 1-im marte in Lahti
Li Raw-Air 2020:7-im e 8-im marte in Oslo
10-im marte in Lillehammer
12-im marte in Trondheim
14-im e 15-im marte in Vikerswund quam Ski-Voltation
19-im til 22-im in Planica quam li Championatu mundal de Ski-Voltation 2020

Li favorites:

Ryōyū Kobayashi: Il es li top-favorite, pos que il ha victat li Mund bocale 2018/19, li Championatu mundal de Ski-Voltation 2019, li Quar-Salterías Torney 2018/19, li Willingen Five 2019, li Raw Air 2019 e li Planica 7 2019. Ti es omnicos evts, queles il posse victer in li passat season.
Kamil Stoch: Il ha esset li dominator del eason 2017/18: Il ha victat li Mund bocale, li Quar-Salterías Torney e li Olimpic Ludes con un aure-medallie (Grand-saltería)
Markus Eisenbichler: Detra Kobayashi il ha eset li duesím del Quar-Salterías Torney e li Planica 7.
Stefan Kraft: Il ha victet li Mund boclae 2016/17 e li duesím del passat season.

Li odie va victer (canzon)

HATARI:  Hatrið mun sigra (Li odie va victer)

Normalmen li canzones del Eurovision Canzon Concurse es enoyant. In li annu 2019 noi have un tre ínusual canzon de Island. In prim li gruppe HATARI canta islandesi. Hodie presc omni participantes canta en anglesi. Li musica e li show sur li scene es tre rapid e brutal. It amemora al german gruppe Rammstein, ma HATARI es un tre political musica gruppe. HATARI es un declarat adversario del capitalisme e anc have li tipical scandinavian humor. HATARI demandat del prim-ministre de Israel Benjamin Netanjahu un lucte secun li old islandesi traditiones. In casu de su successe Israel vell reciver li islandesi insul Vestmannejar por constructer ta israelesi colonias.
Li textu del canson "Hatrið mun sigra" (Li odie va victer) parla pri li fine de Europa e li final victorie del odie súper li amore. Por li Eurovision Canzon Consurse quasi un provocation. Yo ha traductet li textu del canzon ex li anglesi e german traduction in nor Interlingue. Yo va votar por Island. Pro to ISLAND 12 PUNCTUS!

 

LI ODIE VA VICTER 

Li debocheríe esset sin limites
Li posebricherie esset sin fine
Li vive es sin sense
Li vacuitá va capter nos omnes

Li odie va victer
Li felicitá va finir
Proque it es un fraude
Un deceptiv illusion

Omnicos quel yo videt
Lacrimes flue de supra
Omnicos quel yo dat
Esset unvez dat
Yo ha dat a te omnicos

Multilateral deceptiones
Unilateral punitiones
Dupabil perditores
Li fugida va finir

Li odie va victer
Europa va dispolvar
Un rete de menties
Va levar se ex li cindre
Unit quam un

Omnicos quel yo videt
Lacrimes flue de supra
Omnicos quel yo dat
Esset unvez dat
Yo ha dat a te omnicos

Omnicos quel yo videt
Lacrimes flue de supra
Omnicos quel yo dat
Esset unvez dat
Yo ha dat a te omnicos

Li odie va victer
Li amore va morir
Li odie va victer
Li joya va finir
Proque it es un fraude
Un perfid illusion

Li odie va victer

Li baptisme sub li Triglav

France Prešeren es egardat quam li national poet de Slovenia. Li slovanan avangard rock-gruppe Laibach fat un canzon secun un poema de France Prešeren. Laibach es un parte del artistic-collective Neue Slowenisch Kunst fat un modern teatrial version del national epopé Krst pri Savici (Baptisme sur li Savica). 

Li canzon Li Baptisme sub li Triglav esset un parte de ti teatre version. Yo ha traductet li textu de ti canzon ex li anglesi version in Interlingue.

LI BAPTISME SUB LI TRIGLAV

Noi combatte pro noi self

Li actes de multes ha passat

Campes es semat per cadavres

Suol superflue de sangue, putriente

Li max grand parte del munde

Apartene al infantes de Slava

Ni va trovar nor via, nor crede e principies

E si li deos vell benedir nos per li morte

Min terribil es li nocte

Intra li plicas del nigri suol

Quam dies del sclavitá

Sub li brilliant sole

Solitá (Canzon de Clan of Xymox)

Yo ha traductet li canzon "Loneliness" (Solitá) del gruppe Clan of Xymox. Clan of Xymox es un musica-gruppe quel comensat luder in li annus 80s, ma it es ancor tre activ. Ili veni de Nederland e fa mistic gotic rock-musica, "Loneliness" esset publicat in li annu 2017. It es un trist canzon con un hipnotic voce e musica. Anc li video sur You Tube es tre impressionat. Yo ama it mult.

Clan of Xymox: Solitá

Tu ne escuta un cose quel yo ha dit

Tu ne save mi solitá

Yo regarda fixmen al interiore e senti depresset

Tu vell sentir li dolore in mi caresse.



Tu vell sentir li dolore in mi caresse

Tu vell sentir li dolore in mi caresse



Dunc hé! Questiona me qualmen yo senti

Di que tui amore es real e

Hé, veni a ci por finir omni mi timores

Dunc hé! Questiona me qualmen yo senti

Di que tui amore es real e

Hé, veni a ci por finir omni mi timores



Noi porta li masca quel grina e menti

It cela nor guancies e ombra nor ocules.

Pro pro li munde deve esser finir

In contation de omni nor lácrimes e sospires



Li munde es un vele de lácrimes

It devenit plu mal durant li passat annus




Dunc hé! Questiona me qualmen yo senti

Di que tui amore es real e

Hé, veni a ci por finir omni mi timores

Dunc hé! Questiona me qualmen yo senti

Di que tui amore es real e

Hé, veni a ci por finir omni mi timores



Tu ne save que yo es sin esperantie

Li long dies yo ha passat in vacuitá

E quande yo trovat que li porta esset serrat

Yo tirat  e pussat e ped-presset e frappat




Dunc, hé da tui cordie a me e

Di que tu vole esser

ancor proxim de me e fa un fine al misere e



Hé noi es intentionat esser juntmen e

Hé da omnicos de te a me

For, con li obscur dies

Di que tu vole haver me denov.

Li Nive quam Conquestator (Original poema)

 

LI NIVE QUAM CONQUESTATOR

 

Subitmen in li februar li hiverne ha retornat con mult nive. Yo ha fat un litt poema pri to.

Partú es li nive,

It covri li prates,

Li blanc drap del hiverne,

Conquesta li países.

Li Anatema del Sepultoria (Obscur Legende)

It es ancor hiverne. Li jornes su curt e li noctes long. Certmen un bon témpor por leer quelc obscur legendes. Noi ne save quant témpor noi have in nor vive. Quelcvez on reflecte pri li morte. Precipue si on visita un mort membre del familie sur li sepultoria. E to posse esser tre dangerosi qualmen nor yun heróa deve experir. Yo ha trovat li obscur legende "Li Anatema del Sepultoria" in li internet. Yo ha traductet e un poc extendet it.

LI ANATEMA DEL SEPULTORIA

Yo visitat li tombe de mi mort grandmatre sur li sepultoria. Quande yo stat devan su sepultora yo reflectet qualmen on se senti si on es mort. Yo ne savet quant témpor ha passat.

Subitmen omnicos devenit obscur. Li vente sufflat e yo sentit me vertiginosi. Brevi antey omnicos devenit nigri, yo videt un puella in un blanc robe. Ella regardat fixmen a me con un vacui expression in li facie.

Alquande yo reapertet mi ocules li puella ha desaparit. Yo esset tre felici que yo ancor vive e yo pensat que yo esset salvat. Yo decidet que nu yo va juir li vive plu quam antey.

Ma in ti momente ella retornat con un cultelle in li manus. Yo audit un frigid e rud voce quande ella dit. „A te mey evenir li sam quam a me!“

Li pallid puella curret a me e yo ne posset mover me plu. Yo criat sonorimen, ma yo esset tot solitari. Nequí va auxiliar me! Tande yo sentit un pica e omnicos devenit obscur circum me. It esset quam alquí ha extintet li luce.

In ti momente yo savet qualmen on senti si on es mort.

Li Clave al Perition

It es bon si on have bon amicos o amicas. Ma qui es un ver amico e qui ne? On ne save it antey quande nor povri heroa Liv deve vider. Yo ha trovat ti litt obscur-legende raconta in li internet, traductet it e ha chageat it un poc

LI CLAVE AL PERITION
Un die pos mi nascentie mi genitores recivet un misteriosi lettre. In it esset scrit: „Vor filia va morir in li ultim die de su deciduesim annu de vive in li ultim minute ante minocte.“
Hodie es li ultim die del deciduesim annu de mi vive. Desde mensus yo contat li dies til mi morte. Mi max bon amica Anna esset li sol person qui savet pri ti advertiment. Yo hat convenet me con ella sur li mansarde de nor scola.

„Anna“, yo chuchotat quande yo ascendet li scalunes. Ma it ne venit un response. Presc un demí-hor yo sedet in li polvosi coridor. Ma Anna ne venit.
Quande yo hastat in hem alquó strangi evenit. Yo audit un clocca tic-tacar. Ma yo ne portat un braselett-clocca e yo esset tre distant de alcun cloch-turre. Yo comensat currer in horrore. Li clocca tic-ticat plu e plu rapidmen.
Tande yo mispassuat e cadet. It esset tre desfacil por me respirar.
E tande yo videt Anna. Ella regardat a me con un strangi splendore in li ocules. Ella chuchocat con un frigid voce: „It ne es ancor minocte“.
Ella comensat maliciosimen subrider: „Ma Liv it ne es mal si tu mori plu tost. Yo pretendet esser tui max bon amica durant tot tui vive. Yo ha atentet que tu ne mori ja plu tost. Nam nu yo posse te mortar. Yo ha atendet a to decidu long annus. Ma hodie yo va finir it.“
It esset tre strangi. Yo ne posset defender me. Yo ne posset mover me. Ex mi gurgul venit un croacada. Yo ne posset criar por auxilie. Ma yo ne posset me protecter. Anna tirat un long cultelle ex su jeans-pantalones e picat li lame in mi gurgul.
Li utim cose quel yo audit esset quande Anna dit a me: „Bon viage!“

Mi image in li spegul

Pos un grand pause yo presenta nu un nov litt horror-raconta de me. Yo hat trovat ti raconta in li internet e it es sin autor. Yo ha traductet it in Interlingue. Fórsan vu va memorar it quande vu regarda li sequent vez in li spegul. E ples ne mocar vor image in li spegul quam nor povri Luisa hat fat it!

MI IMAGE IN LI SPEGUL

„Noi comemora Luisa, qui suicidiat in li yun etá de 13 annus. Reposa in pace“,“ finit li tremid voce de un fémina su oration.

Un manu esset posit sur li sarco e yo audit un singlute. Fórsan to esset mi matre. Ma yo ne savet pro que yo ne posset mover me. Nam yo volet vermen con plesura frappar al paretes de mi sarco, criar e forlassar mi sarco. Ma yo ne posset pro que yo es mort. Ma yo vole narrar omnes qualmen yo vermen hat morit. Que it ne esset un suicide! It esset ELLA: Mi image in li spegul!

It ta véspere yo esset sol in hem. Mi matre hat eat con su amicas in li cinemá. It esset ja deci horas e demí e yo esset ja fatigat, dunc yo volet ear dormir. Yo hat decomutat li lume e mi regard hat glissat li old spegul. Noi hat comprat it sur un pulce-mercate.

Yo havet li strangi sentiment que mi image in li spegul regardat a me fixmen. Yo levat me ex li lette e haltat avan li old spegul. Pro joca yo monstrat mi lingue a mi image in li spegul. Pos to yo regardat mi reflexion in li spegul ancor un poc plu exactmen. In ti momente yo perceptet, que mi image in li spegul hat comensat grinar. Mi hala stagnat.

Ma subitmen yo hat perceptet que it esset yo self qui hat grinat. Ma yo totmen ne volet grinar! Li ocules de ti person in li spegul hat devenit rigid. Li puella in li spegul hat levat in prim li levul manu e tande li dextri e ductet it a mi gurgul.

Yo volet liberar me, ma yo ne successat. Yo provat que mi manus cessar mover se, ma van. Yo volet criar, ma null son venit ex mi gurgul.

Subitmen yo audit li brue de un porta infra in li dom. Mi matre hat retornat a hem. Yo prendet mi tot fortie e volet clamar, ma to esset un errore! Yo vell hat me concentrar plu bon a mi manus, nam exactmen in ti momente mi manus presset mi gurgul e sprangulat me. Omnicos devenit nigri avan mi ocules. It esset tro tard!

Li old dom

Pos un long pause yo hat finitmen traductet denov un curt horror-raconta ex li internet. It es certmen un bon raconta por tal long noctes hivernal quam nu.

LI OLD DOM

Simone translocat in un old dom. Ella esset tre felici pro que li dom esset tre modic.

Li dom esset obscur e al interiore it esset moblat old-modic. It havet anc un litt jardin avan li dom con un tombe. Sur li tombe esset scrit solmen li nómine „Anna, nascet 1850, morit 1869“.

Durant un nocte it esset un fúlmin-tempe. Subitmen Simone esset avigilat per un sonori tónner. In li lume del fúlmine Simone videt subitmen un yun fémina in su dormitoria. Ella stat ta e havet long nigri capilles e su pelle esset tre pallid, su bocca covrit con sangue e su ocules esset excavat per un cultelle.

Simone terret tant mult, que ella criante curret éxter li dom in li jardin. Subitmen ti horrid yun fémina stat denov avan li tombe.

Li yun fémina tenet un cultelle in li dextri manu e dit: „Yo es Anna. In mi deci-ninesim die de nascentie esset me expicat li ocules e yo esset mortat. E nu yo va far li sam con te ...“

Noi es fat ex reves e lácrimes

Yo ha recivet un carte con un tre bell poema e yo decidet de traducter it in Interlingue.

NOI ES FAT DE REVES E LÁCRIMES

POEMA DE LOTHAR ZENETTI

Noi es fat ex reves e lácrimes,
si tu es in luctu,
yo va consolar te.

Noi es fat ex die e véspere,
si tu senti frigid,
yo vole calentar te.

Noi es fat ex timore e esperantie,
si tu di morte,
yo va dir vive.

Li nive ha retornat (Poema in Interlingue)

Yo ha scrit un litt poema in Interlingue. Li titul es "Li nive ha retornat". Yo anc ha fat un litt video por it.

Ci es li textu del poema in Interlingue e in un anglesi traduction:

LI NIVE HA RETORNAT
Poema original in Interlingue de Valodnieks

Silentmen it ha retornat,
Regarda quo it ha fat,
Plongeante li munde,
In un blanc unde.

Frigid quam li morte,
it aspecte quam un torte,
ma it es presc li fine
de ti long hiverne.

Li verne va nos liberar,
e va li nive escartar,
Adminim in li estive,
it ne hay alcun nive.

THE SNOW HAS RETURNED
English translation

Silently the snow has returned.
Look what it has done.
It plunges the world.
in a white wave.

Cold as the dead,
it looks like a cake,
but it is nearly the end
of this long winter.

The spring will liberate us.
and will remove the snow,
At least in the summer,
there is no snow.

In tui dome (Canzon de The Cure)

E ci ancor un canzon del anglesi rock-musica gruppe The Cure. Yo ha traductet li canzon “In your house” (In tui dom) del anglesi rock-musica gruppe The Cure. It esset anc publicat in li annu 1980 sur li album “Seventeen Seconds” (Deci-sett secondes). Secun mi opionion un del max bon albumes de The Cure.

IN TUI DOM

Yo lude in li nocte in tui dom

Yo vive un altri vive

Yo pretende svimmar

In tui dom.

Yo changea li témpor in tui dom

Li hores yo prende

Passar tant lentmen...

Yo ne audi un son in tui dom

Silentie

In li vacui chambres.

Yo drona in li nocte in tui dom.

Pretendente svimmar

Pretendente svimmar.