Li occulares del horrore (Obscur legende)

 

 LI OCCULARES DEL HORRORE

Obscur legende in Interlingue

Desde tre long témpor yo finalmen traductet e expandet denov un curt obscur legende in Interlingue-Occidental. Yo trovat la raconta in li internet e changeat it un poc. Li titul del raconta es "Li occulares del horrore", Yo anc porta occulares, ma til nu nequó evenit a me quam con nor povri heroa Ines qui devet ear comprar nov occulares. Qui pensa que to posse esser dangerosi...

Ines narra li sequent raconta:

"Yo besonat nov oculares e yo eat con mi matre al optico. Ta it hay un modelle por un special precie. It esset vermen tre modic. Quande yo departet del butica, yo esset tre astonat: Subitmen yo videt partú strangi besties.

Yo questionat mi matre ca ella save quo eveni ci. Ma ella regardat a me e esset surprisat: "Ines, quel animales? Yo ne vide les!"

Evidentmen solmen yo posset vider li besties. Pro to yo deprendet li oculvitres e in fact li animales desaparit. Tre strangi!

Yo retornat al optico e petit le ca il posse denov controlar li oculares. In ti moment yo audit un strangi rugiment*.

Yo tornat me e terret: Rect detra me stat un del animales e attacat me"

*Rugir es li son del leon

Li céllar del horrore (Obscur legende)

Yo ha traductet e extendet denov un litt obscur legende. Esque vu anc have quelcvez un strangi sentiment si vu entra in li céllar de vor dome? Esque vu quelvez anc pensa audir strangi bruidas ta? Esque to es solmen nor imagination o plu? Forsan vu va memorar quande vu li sequent vez debe entrar in li célllar de vor dome ti-ci litt raconta de Kristina, qui es in li etá de 13 annus. Ti-ci raconta anc esset publicat in mi version in li numeró 23 del jurnal "Posta Mundi".

Li céllar del horrore

Ja sempre yo odiat li céllar in nor dome. It es frigid, obscur, humid e sovente li lampe ne functiona. Ma to ne es omnicos. Depos quelc témpore yo mem escuta un strangi melodie de alcú chascun vez yo entra in li céllar. It es tre piani, ma it sona quam un litt puella vell cantar it. Mi genitores e mi plu old fratre solmen moca me pro to. Mi matre dit a me: “O Kristina tu ja have 13 annus. To es vermen ridicul!”.

Yo evita entrar in li céllar. Ma ye ti véspere mi fratre e mi patre ne es in hem e yo es sol con mi matre. Ella prepara li supé e peti me aportar un cucumbre por li salade ex li céllar. Quande yo escuta su demande yo save que yo debe far to.

Quam in transe yo entra in li céllar. Subitmen yo escuta tre clarmen li voce del puella. Yo deveni rigid pro timore. Li cantada es plu sonori quam antey. It veni ex li céllar ú es situat li calentation de nor dome.

Li musica atrahe me magicmen. Prudentmen yo aperte li porta de ti chambre. Li porta craca e yo posse vider in li chambre. Yo regarda fixmen un vacui stul. Sangue guttea del stul al planc-suol. Lentmen yo entra in li chambre por regardar plu exactmen to quo eveni ci. Ma subitmen yo senti un fort vente e li porta clude se sonorimen. Li lampe flammea e extinte se. Yo es in li trappe! Yo cri e prega a Deo que mi matre posse audir me. Ma it es totmen quiet e frigid. Yo comensa plorar. Yo audi li rise de un infanta e yo cria mem plu sonorimen.

Pos un eternitá por me mi matre aperi li porta e libera me ex li chambre. Plorante yo questiona mi mamá ca ella anc ha audit li voce del puella. Ella regarda me fixmen e sucusse li cap e di que ella ha audit solmen mi cris por auxilie.

Depos ti die yo audi li melodie del puella ne solmen quandecunc yo entra li céllar, ma mem in li nocte. Yo time que yo perdi mi rason e deveni frenesi. Yo dormi min e min.

(Kristina 13 annus)

Li morte (un obscur legende)

Yo ha traductet e extendet un curt obscur legende in li lingue Interlingue-Occidental. Li autoressa del original textu es Anna e el have 14 annus. Per ti-ci litt raconta noi posse vider qual potent e dangerosi quelcvez nor desires es. Rabie e li desire por venjantie posse haver tre mal consequencies qualmen nor car Anna devet experir. Ma esque hay un plu fort emotion se amore transforma se in odie e li desire por venjantie? Lass noi vider quo evenit con Anna...

LI MORTE

Yer mi amíco ha abandonat me. In prim yo es self-comprensibil tre trist e yo plora longmen. Ma pos mi lácrimes es siccat, yo es solmen ancor furiosi. Vermen rabiat! Qualmen il posset far to a me? Il fraudat me con mi optim amíca. Yo es por quelc dies paralisat e yo ne save quo deve far. Yo senti me tant humilisat e solitarimen.

Yo ne posse indormir in li nocte. E se yo vermen successa dormir, yo have terríbil somnies: Yo aproxima me plen de odie a mi ex-amíco e su nov amíca. In mi manus yo porta un cultelle. Ciec pro li lácrimes in mi ocules yo atacca les til yo vide partú lor sangue. Yo audi lor cries. ... Subitmen nequí capte me e tira me al planc-suol e finalmen yo criante avigila me. Yo es denov in mi chambre, ma mi cap-cussine es humid de lácrimes e de sudore.

Ma in li scole seque li grand choc: Yo es informat de mi instructor que mi ex-amíco e su nov amíca esset mortat durant li nocte. In me cresce li suspection que mi somnie ha realisat se. E yo questiona me self ca yo es cupábil. Qualmen yo posse continuar viver con un tant culpa? Tande mi instructor di a me que li policie vole parlar con me...

ANNA 14 annus

Lu íncert (un obscur legende)

Yo ha traductet e extendet un curt obscur legende in li lingue Interlingue-Occidental. Li autoressa del original textu es Anna e el have 13 annus. Lass nos leer li trist raconta de ti povri puella! Forsan noi posse auxiliar la. Ma qualmen?

LU ÍNCERT

Yo jace sur li canapé in li salon e reva un poc. Subitmen un burasca clúde sonorimen li porte del chambre e yo leva me aterret. Mi cordie palpita tre rapidmen e mi manus treme. Tande yo ride pri me self. Qualmen yo posse esser tant timorosi? Yo have ja 13 annus! It esset solmen li vente. 

Ma poy yo have un tre desquietant pensa. Yo ne ha aperet un fenestre in li tot dom quel vell ha posset clúdet li porte. Subitmen yo es tre vigil. Quo eveni ci? Poy yo senti un aer-currente directmen apu mi nuc. It seque un piani ma audibil chuchota. Yo audi it tre clarmen apu mi orel. Li menacie aterre me e mi tot córpor comensa tremer: “Tu va ancor hodie morir!” Yo leva me rapidmen del canapé por escapar de ti-ci horríbil eveniment. 

Ma yo ha joyat tro tost! Li horrífic voce perseque me. It es sempre in mi cap! Chascun die, chasun hor e chascun minute! Quo yo posse far? Ples auxiliar me! Yo ne posse tolerar to plus! Lentmen ma certmen yo perdi mi rason.

Anna 13 annus

Li salvation in li final minute (un obscur legende)

Car amicos!
Yo ha traductet ancor un vez un obscur legende ex li internet. Li autoressa Zoe es in li etá de 12 annus. Ti-ci raconta have in contrari al mult altri obscur legendes un felicosi fine. Yo desira agreabil letura! Lass nos leer quo Zoe raconta:


LI SALVATION IN LI FINAL MINUTE

"Li nubes súper me deveni plu e plu obscurmen. Yo regarda desquitmen al ciel. Strax it ja comensa pluviar fortmen. Yo sercha rapidmen un protection contra li pluvie sub un del árbores al márgine del via. Yo recive un choc pro un tónnere. Li scintillant luce de un fúlmine lucida li ciel. O ve! Quande ancor un fort fúlmine eclata al horizonte, yo vide un strangi person ye li altri látere del via. Yo vole saver qui to es e transea corageosimen al altri látere del via. Ma yo posse vider nequém. Poy un bruiosi clacca resona. Li fúlmine ha cadet in li árbor sub quel yo hat stat til quelc minutes. Ne vell har aparit li strangi person, yo vell esser certmen mort."
(Zoe 12 annus)

Un dangerosi stupiditá (obscur legende de Aline, 13 annus)

UN DANGEROSI STUPIDITÁ (Raconta de Aline, 13 annus)

Noi ha translocat ja denov! Poc a poc yo es vermen incolerat. Mi matre prova calmar me per dar a me li optim e max bell chambre in li nov dom. Ma ti vez ella vermen ha exagerat se self! Li chambre es bellissim e yo lassa me cader al grand e moll lette. Yo senti quam un princessa!

Proque it es ja tarde in li véspere e yo strax indormi. Ma yo ha un somnie strangi: In mi somnie yo vide un litt flicca, qui torna su dorse a me. Ella di in un piani voce. "Fugi! Ples fugir strax!" Yo vole vider li facie del puella, ma ella comensa singlutar e nu ella yella: "Fugi! Ne atende! Fugi!".

Yo avigila humidmen per sudore. Yo di a me self tranquilisante: "It esset solmen un somnie!"

Subitmen yo audi un sonori anhellation. Ex un angul de mi chambre un persona adcurre impetuosimen vers me. Poy yo vide solmen ancor un acut e brilliant objecte. In ti moment yo conscie que li somnie esset un advertiment, quel yo ha regretabilmen ignorat! Ma nu it es tro tard!