Li Litt Prince (Capitul 6)

LI LITT PRINCE CAPITUL 6

VI

Ah, litt prince, plu e plu yo ha comprendet tui litt, melancolic vive. Tu havet longmen por divertisser te nequó altri quam li bellitá del descensiones del sole. Yo experit to in li matine del quaresim die quande tu dit a me:

"Yo tre ama li descensiones del sole. Lass nos regardar un descension del sole ..."

"On deve ancor atender un poc... "

"Atender a quo?"

"Atender til li sole descende."

In prim tu ha fat un tre astonat visage e tande tu ha ridet pri te self. E tu ha dit a me:

"Yo sempre imagina me que yo es in hem."

In facte. Quande it es midí in li Uniti States, li sole descende – quam chascun save – in Francia. Por assister ta in un descension del sole, on vell dever possr aviar in un minute a Francia. Ínfelicimen Francia es tro distant. Ma sur tui planete it sufice mover li fotel quelc passus. E tu experi li crepuscul tant sovente tu desira it...

"Yo ha videt in un die li sole descender quarant-quar vez!"

E un poc plu tard tu adjuntet:

"Tu save, si on es tre trist, on ama li descensiones del sole..."

"In li die del quarant-quar vez tu esset extradordinari trist?" Ma li litt prince ne respondet.

Li Litt Prince (capitul 5)

LI LITT PRINCE CAPITUL 5

V

Chascun die yo aprendet alquó nov pri li planete, pri li departe e pri li viage. To evenit tre lentmen in li curse de mi reflectiones. Talmen yo aprendet in li triesim die li tragedie del baobab-árbor. Anc to yo finalmen debi al agne, nam subitmen li litt prince questionat me quam il vell esser vexat de grav dúbites:

"Ma it es just que agnes manja arbustes."

"Yes, to es just."

"Ah, tande yo es felici!"

Yo ne comprendet pro quo it es esset tant important que agnes manja arbustes. Ma li litt prince adjuntet:

"Tande ili anc manja baobab-árbores?"

Yo explicat al litt prince detalliatmen que baobab-árbores ne es arbustes, ma árbores queles es tam alt quam un cloch-turre. E mem in ti casu que il vell prender con se un tot greg de elefantes, ti greg ne vell posser luctar contra un sol baobab-árbor.

Li idé con li elefantes fa rider le.

"On vell dever les staplar ..."

Ma tande il remarcat inteligentmen:

"Ante li baobab-árbores deveni grand, ili comensat in prim litt."

"To es corect. Ma pro quo tu vole que tui agnes manja li litt baobab-árbores?"

Il respondet: "It es ja bon! Noi va vider!" Sam quam it acte se pri li max clar cose del munde. Yo devet usar tot mi intelectu por comprender ti cose.

In facte hay sur li planete del litt prince sam quam sur omni planetes bon e mal plantes. Pro to anc hay bon granes de seme del bon plantes e mal granes de seme del mal plantes. Ma li semes es ínvisibil. Ili dormi misteriosimen in li terre til un de ili veni in mente avigilar se. Tande it extende se e in prim germina timidmen un ravissent litt gérmine, quel es tre ínofensiv. Si it acte se pri li gérmine de radís o de un rose on posse far crescer it qualmen it vole. Ma si it acte se pri un nociv plante on deve tirar it ex li terre tam bentost quam on reconosse que it es un tal plante. Sur li planete del litt prince existet terribil semes... e to esset li semes del baobab-árbores. Li suol del planete esset plen de ili. Ma on ne posse plu desembarassar se de un baobob-árbor si on comensa intervenir tro tardmen in it. Il apropria se del tot planete. Il penetra it con su radicas. E si li planete es tro litt e li baobab-árbores deveni tro numerosi, ili fa exploder li planete.

"It es un question del discipline", dit a me plu tard li litt prince. "Si on ha finit su matin-toilette, on deve cuidosimen far li matin-toilette del planete. On deve fortiar se regularimen tirar li gérmines del baobab-árbor ex li terre tam bentost quam on posse les distinter del rosieros a queles ili es tre simil in lor yunesse. To es advere un enoyant, ma facil labor."

E un die il consiliat me, que yo deve efortiar me que yo successa far un bell dessine que li infantes che me in hem amemora it corectmen. "Si un die ili comensa viagear", il dit, "ili posse profitar de it." Quelcvez it ne fa nequó si on ajorna un labor a plu tard. Ma si it acte se pri baobab-árbores, to va resultar in un catastrofe. Yo ha conosset un planete, quel es habitat de un pigri person. Il ne hat remarcat tri arbustes..."

E talmen yo ha dessinat ti planete secun li informationes del litt prince. Yo ne parla con plesura quam un moralist. Ma li dangerositá del baobab-árbores es tant poc conosset e li dangeres, queles menacia chascun, qui perdi li via sur un asteroide, es imens que yo ti un vez abandona mi discretion. Yo di: infantes, atention! Li baobab-árbores! Por ganiar li atention de mi amicos por realisar li dangere, quel - ínconosset - menacia me e les ja desde long témpor, yo ha laborat mult in ti dessine. Li lecion, quel yo da per it, certmen merite li pena. Vu fórsan va questionar vos: Pro quo  ti libre ne contine ancor altri, anc grandiosi dessines quam li dessine del baobab-árbores? Li response es tre simplic: Yo ha vermen provat it audacimen, ma yo ne ha successat, Quande yo dessinat li baobab-árbores yo esset inspirat del sentiment del urgentie.

Li Litt Prince (Capitul 4)

LI LITT PRINCE - CAPITUL 4

IV

Yo decovrit un duesim tre important cose:

Li planete de su orígine esset solmen un poc plu grand quam un dom!

To ne semblat a me totmen astonant. Yo ya savet que except li Terra, Jupiter, Mars e Venus, a queles on hat dat nómines, ancor hay centenes de altris, queles quelcvez es tant litt, que it es penosi vider les in li telescop. Si un astronom decovri un de ili, il da a it in vice de un nómine un númere. Il nómina it por exemple: Asteroide Númere 325.

Yo have seriosi motives creder que li litt prince venit del asteroide B 612. Ti planete esset solmen unvez videt in li annu 1909 de un turc astronom in li telecop. Il hat tada fat un discurse in un international congress de astronomes pri su decovrition. Ma nequí hat credet le e tre simplicmen pro su vestimentes. Talmen es li grand homes.

Por li chance del reputation del planete B 612 un turc dictator comandat a su popul sub li menacie del suplicie que it deve portar solmen europan vestimentes. Li astronom recitat su discurse in li annu 1920 in tre elegant vestimentes. E ti vez omnes consentit con il.

Si yo narra vos ti ínimportant detallies pri li planete B 612 e confide a vu mem su númere, yo fa to solmen pro li grand homes. Li grand homes have un preferentie por ciffres. Si vu narra vos pri un amico, ili nequande interroga vos pri lu essential. Ili nequande questiona vos: Qualmen sona su voce? Quel ludes il ama maxim mult? Esque il colecte papiliones?

Ili questiona vos: Quant annus il have? Quant fratres il have? Quant il pesa? Quant pecunie gania su patre? Solmen tande  ili crede que ili conosse le.

Si vu di al grand homes:

"Yo ha videt un tre bell dom con rubi briques, con geranies avan li fenestres e columbes sur li tegment..., in ti casu ili ne es capabil imaginar se ti dom. On deve dir a ili: Yo ha videt un dom quel have un valore de cent mill frances. In tal casu ili strax clama: Ah, qual bell!

Anc talmen, si vu di a ili: Li pruva por que li litt prince ha vermen existet, es que il esset ravissent, que il ridet, que il volet haver un agne. Nam si on desira un agne, it es vermen un pruva por to que on vive. Ma tande ili va levar li epoles e ili va tractar vos quam infantes. Ma si vu di a ili: Li planete, de quel il veni, es li planete B 612, tande ili va esser convictet e ili va lassar vos in pace con lor questiones. Talmen ili es. On ne posse blamar les pro to. Infantes deve esser tre indulgent con grand homes.

Advere noi, qui save, quo li vive es realmen, noi deride solmen ti stult ciffres. Yo vell har preferet comensar ti raconta quam un fabul. Yo vell har favorat max mult comensar talmen:

"Unquande esset un litt prince, qui habita sur un planete, quel esset solmen un poc plu grand quam il self e il besonat un amico ... " Por ili qui comprende li vive corectmen, to vell semblar max mult credibilmen.

Nam yo ne vole, que on ne regarda mi libre seriosimen. Yo senti tant chargrin durant yo narra ti memories. Nu it ha ja passat six annus desde mi amico con su agne ha foreat. Si yo prova ci descrir le, yo fa to por ne obliviar le. It es trist obliviar un amico. Ne chascun ha havet un amico. E yo posse devenir quam li grand homes, queles es solmen interessat pri ciffres, pro to yo ha finalmen comprat un color e crayones por dessinar.

It es desfacil comensar in mi etá ancor unvez dessinar, si on ne ha fat desde su sixesim etá nequande altri provas quam tis de un cludet e apert gigant-serpente. Yo va self-comprensibil provar far li images tam realistic quam possibil. Ma yo ne es totmen cert ca yo va successar in it. Li un dessine es acceptabil, li altri ja ne es plu simil.

Yo anc erra me quelcvez in li proportiones. Ci li litt prince es tro grand e ta il es tro litt. Yo anc chagrina pri li color de su vestimentes. In ti casu yo prova denov e denov, quam bon it es possibil. Yo va certmen errar me anc pri plu important detallies. Ma on deve pardonar me to. Mi amico nequande ha dat me explicationes. Il ha credet probabilmen que yo es quam il. Ma regrettabilmen yo posse vider tra li plancas del bux li agnes. Yo ja simila plu al grand homes. Yo devet devenir plu old in li curse del témpor.

Li Litt Prince (capitul 3)

LI LITT PRINCE

CAPITUL 3

III

Yo besonat mult témpor por comprender de u il es. Li litt prince, qui posit mult questiones a me, semblat nequande escutar. Per hasard captet paroles revelat a me poc a poc su secrete. Talmen il questionat quande il videt por li unesim vez mi avion (yo ne va dessinar mi avion, to vell esser un mult tro complicat afere por me):

"Qual es ti-ta cose?"

"To ne es un cose. It avia. To es un avion. It es mi avion."

E yo esset fier que yo posset dir a il, que yo posse aviar. Tande il clamat:

"Qualmen! Tu es cadet ex li ciel?"

"Yes", yo dit modestmen.

"Ay! To es vermen amusant ... "

E li litt prince havet un tre fort atacca de rision, quel infuriat me mult. It es important por me que on   egarda mi accidentes seriosimen.

Ma il continuat:

"Do anc tu veni del ciel! De quel planete tu es?"

In ti momente yo comprendet li secrete de su presentie e yo questionat hastosimen:

"Do tu veni de un altri planete?"

Ma il ne respondet. Il sucusset solmen mildmen li cap per examinar mi avion:

"Certmen, sur ti cose tu ne posse venir de un tre distant loco..."

E il inmerset se in un revada, quel durat longmen. Poy il prendet mi agne in su tasca e aprofundat se in li aspecte de su tresor.

Vu posse imaginar quant fortmen li alusion pri li "altri planete" devet desquietar me. Do yo efortiat me recever plu informationes pri to:

"De u tu veni, mi litt manette? U es tui hem? A u tu vole prender tui agne con te?"

Il respondet pos un pensativ tacentie:

"Li bux, quel tu ha donat a me, have li avantage que it posse servir por li agne quam hem in li nocte."

"Certmen. E si tu es gentil, yo va dar te anc un corde por ligar it durant li jorne. E in plu un palisette.

It semblat que ti proposition ofendet li litt prince.

"Ligar it? Qual strangi idé?"

"Ma si tu ne liga it, it va forcurrer..."

Il anc comensat rider:

"Ma a u it mey currer?"

"A alcú. Rect ... "

Tande li litt prince replicat:

"To fa nequó, it es tant litt che me in hem!".

E fórsan un poc melanolic il adjuntet:

"It ne posse ear lontanmen rect..."

Laibach: The Whistleblowers (canzon)

Li post-industrial musica-gruppe Laibach de Slovenia ja existe desde 1980. Ili es li centre del avan-guardistic collective del arte „NEUE SLOWENISCHE KUNST“ (Nov slovenian arte). Laibach sempre lude anc con totalitari simboles e monstra per su arte que totalitari sistemas producte sempre li identic simbolica. Ma per li usada del tal simboles Laibach sempre defama anc li idés del totalitarisme quam nationalisme e comunisme. Ante quelc annus Laibach ja declarat su propri state „Li NSK-state“ con pasportes e un propri civitá. In ti-ci mensu nu li nov album de Laibach ha aparit con li nómine „Spectre“. Nu Laibach anunciat li formation de un partise con li nómine „Spectre“. On posse se registrar in li internet quam membre. Sam quam li NSK-state to es un utopic arte-projecte. Yo ha traductet li canzon „The Whistleblowers“ (Li Siflistes) del nov album. Li video e li textu monstra tre bon li simbolica e ironie de Laibach.

LAIBACH: THE WHISTLEBLOWER (LI SIFFLISTES)

 Noi ascende, noi cresce

Noi vade, noi sta altmen

Noi nequande cade

Tam grand quam li ciel

Tam distant quam li crepuscul

Noi vade

E noi ne cade.

Noi dormi, noi somnia

Con null témpor inter

Noi nequande halta

Sifflar nor cante

In li calore del nocte

Noi canta

Li spíritu es pur

De nord e sud

Noi veni del ost e west

Respirant quam un unité

Vivient in fama

O morient in flamme

Noi ride

Nor mission es benedit

Noi combatte por te

Por un libertá sin exemple

Noi pensa quam un unité

Noi rula along

Al tacte del tambur

Noi marcha

Li machine del nigri cruce

Noi sta sol

Ma bentost li die va arivar

Quande li libertá sona

Noi va incontrar denov

Nu eternimen

E vader

Ancor un vez quam un unité!

Li Litt Prince (Capitul 2)

Ci es li duesm capitul del Litt Prince

Atention: it es ancor ne finit!

LI LITT PRINCE

CAPITUL 2

II

Do yo restat sol sin alquí con qui yo vell har vermen conversar til yo havet un panne ante six annus in li deserte Sahara. It esset un defecte del motor. E proque yo ni havet un mecanico ni un passageto  che me, yo comensat totmen sol li desfacil reparatura. It esset por me un question pri vive e morte. Yo havet aqua por trincar por apen ott dies. Do ye li unesim vésper ha indormit in li sand, mill milies distant de omni habitat region. Yo esset plu abandonat quam un naufrageant person sur un flottuore in medie del ocean. Vu posse vos pro to imaginar mi surprise quande un strangi voce avigilat me in li aurora.

"Ples ... dessiner me un agne!"

"Qualmen, ples?"

"Dessine me un agne ... "

Yo saltat sur mi pedes, quam un fúlmine vell har tuchat me. Yo ha frottat mi ocules e regardat exactmen. Tande yo videt un litt, tre ínusual mannette, qui regardat me seriosimen.

Ci es li max bon portrete, que yo posset far plu tard de il. It ne es mi culpa. Yo esset ejectet del grand homes in li etá de six annus ex mi carriera quam pictor e yo hat aprendet dessiner nequó altri quam cludet e apert gigant-serpentes.

Do yo regardat me li aparation con grand e astonat ocules. Ne oblivia que yo esset milles de milies distant de chascun habitat region. Anc it ne sembla a me que li litt mannette ni ha perdit li via mi presc mort pro fatiga, fame o timore. It totmen ne fat li impression de un in li medie del deserte perdit infante, mill miles de chascun habitat region. Quande yo finalmen posset parlar, yo dit a il:

"Ma .... quo tu fa ci?"

Tande il repetit tre suavimen quam un tre seriosi cose:

"Ples ... dessiner me un agne ... "

Quande li secrete es tro impressiv on ne audacia resister. Tant absurd it semnlat a me – mill milies distant de chascun homan habitation e in mortal dangere – yo extraet ex mi tasca im fontan-plum. Pos to yo memorat me que hat studiat inter omnicos geografie, historie, calcular e grammatica e yo dit malhumorat que yo ne posse dessiner. Il respondet:

"To fa nequó. Dessine me un agne."

Proque yo nequande hat dessinat un agne,

[[ Image ]]

Li max bon portrete quel yo – solmen a un plu tard momente – esset capabil dessiner.

[[ a levul image de un agne]]

yo hat por il un del unic du dessines, queles yo capabil realisar. Ti del cludet gigant-serpente. E yo esset tre astonst quande yo audit li mannette dir:

"No! No! Yo ne vole un elefant in un gigant-serpente. Un gigant-serpente es tre dangerosi e un elefant besona mult loc. Che mi in hem es poc loc. Yo besone un agne. Dessina me un agne."

Do yo ha dessinat.

Li mannette spectat atentivmen, tande il dit:

"No. Ti es ja tre malad. Fa un altri."

Yo dessinat.

Mi amico subridet gentilmen e con indulgentie:

"Tu certmen vide ... to ne es un agne, to es un agno. It have cornes.. "

Ergo yo fat mi dessine ancor unvez. Ma it esset refusar sam quam li precedentes:

"To es ja tro old. Yo vole un agne, quel vive longmen."

Yo perdit li patientie, it esset vermen témpor perconstructer mi motor, pro to yo dessinachat ti dessine e grunir in plu:

"To es li bux. Li agne, quel tu vole, es intra it."

E yo surprisat quande li facie del mi yun criticard brilliat subitmen:

"To es totmen talmen, qualmen yo ha desirat it. Esque tu opine que ti agne besona mult herbe?"

"Pro quo?"

"Pro que it es omnicos che me in hem o tre litt ..."

"It va certmen suficer. Yo ha donat a te un litt agne."

Il inclinat li cap súper li dessine;

"Ne tant litt quam ... Ma vide! It es indormit ... "

Talmen yo fat li conossentie del petit prince.

Li Litt Prince (Capitul 1)

Ante 70 annus ha aparit li famosi roman "Li Litt Prince" de Antoine de Saint-Exupéry. It es traductet in mult lingues. Ma li version in Interlingue ancor manca. Ma yo va changear to. Ci yo publica mi unesim versiones del traduction del ovre. Ma ili es ancor ne corectet! Yo ha traductet it ex li german!

LI LITT PRINCE 

CAPITUL I

POR LÉON WERTH

QUANDE ES ESSET ANCOR UN PÚER

((Image))

I

Quande yo esset six annus, yo videt unvez in un libre pri li jungle quel have li titul „Experit racontas“, un magnific image. It monstrat un gigant-serpente, qualmen it devorat un bestie. Ci es un copie del image.

In li libre esset scrit. "Li boas devora su preda in tot sin machar it. Pos to ili ne posse mover se e dormi six mensus por digester it."

Tande yo hat mult reflectet pri aventura in li jungle e yo finit per un color-crayon mi unesim dessine. Mi dessine nró. 1. It aspectet talmen:

((Image))

Yo ha monstrat li grand homes mi mastre-ovre e yo questionat les si mi dessine timenta les.

Ili solemen respondet: "Pro noi deve timer nos pro un chapel?"

Ma mi dessine ne monstrat un chapel. It monstrat un gigant-serpente, quel digeste un elefant. Pos to yo ha dessinat li interiore del boa, por explicar it al grand homes. Ili ya besona sempre explicationes.

Ci es mi dessine nró. 2.

((Image))

Li grand homes ha consiliat cessar dessinar apert o cludet gigant-serpentes e que yo mey plu interessar me por geografie, historie, calcular e grammatica. Talmen evenit it que yo abandonat un grand cariera – nam li de un pictor – ja in li etá de six annus. Li dessuccesse de mi dessines nró. 1 e nró. 2 hat descorageat me. Li grand homes comprende nequnade alquó self e it es tro penosi por li infantes explicar les to sempre e sempre denov.

Do yo esset fortiat selecter un altri profession e yo aprendet aviar. Yo circumaviat partú in li munde e li geografie ha auxiliat me vermen mult pri to. Yo posset a prim vise distinter China de Arizona. To es tre practic si on ha perdit li via in li nocte. In li curse de mi vive yo esset in contacte con mult seriosi persones. Yo havet relationes con mult adultes e yo havet li chance observar les totmen ex li proximitá. Secun mi opinion to ne havet un tre bon efecte a me.

Si yo incontrat alcun, qui sembla a me un poc plu astut, yo provat it com mi dessine nró. 1, quel yo hat conservat tre cuidosimen. Yo volet vider, ca il es vermen astut. Ma chascun vez yo recivet li response: "To es un chapel." Pos to yo conversat con il ni pri bois ni pri jungles ni pri li stelles. Yo consentit con su vise-punctu. Yo conversat con il pri bridge, golf, politica e cravattes. E li grand hom esset tre satisfat har incontrat un tal rasonabil mann.